पोतामा प्रथम वडाध्यक्ष भलिबल प्रतियोगिता सुरु, एकै दिन पाँच खेल सम्पन्न
सिमराः जीतपुरसिमरा उपमहानगरपालिका १३ पोतामा बिहिवारदेखि प्रथम वडाध्यक्ष भलिबल प्रतियोगिता सुरु भएको छ । डुमरवाना विकास मंचको आयोजनामा सुरु भएको प्रतियोगितामा एकै दिन पाँच खेल सम्पन्न भएका छन् ।
पोता खेल मैदानमा भएको उद्घाटन खेलमा आयोजक डुमरवानाले बिजयी सुरुवात गरेको छ । मनहर्वालाई ३–० सेटमा पराजित गर्दै डुमरवाना बिजयी भएको हो ।
यसैगरी दोस्रो खेलमा रौतहटले जित हात पारेको छ । रौतहटले पोता भलिबल टिमलाई ३–० सेटमा पराजित गरेको हो । यस्तै तेस्रो खेलमा मकवानपुर भलिबल टिम पालुङले मिलन चोकलाई पराजित गरेको छ ।
मकवानपुरले पालुङमाथी ३–० सेटको जित हात पारेको हो । यसैगरी चौथो खेलमा सिन्धुलीले महोत्तरीलाई ३–० सेटमा पराजित गरेको छ भने पाचौं खेलमा सर्लाही बिजयी भएको छ । सर्लाहीले जुगवा भलिबल टिम लाई ३–१ सेटले पराजित गरेको हो ।
पहिलो दिनको खेलमा जीत हात पारेका टिममध्ये शुक्रवार डुमरवाना र पालुङबीच खेल हुनेछ भने रौतहट र सिन्धुली भिड्नेछन् । यसैगरी सर्लाही र पिलुवा एपीएफबीच प्रतिस्पर्धा हुँदा बसतपुर र महोत्तरी एपीएफबीच खेल हुनेछ ।
बसतपुर र महोत्तरी एपीएफबीचको विजेताले सोही दिन नवलपुर भलिबल टिमसंग खेल्ने आयोजकले जनाएको छ ।
जीतपुरसिमरा उपमहानगरपालिकाको कार्यालय र वडा नं. १३ को सहयोगमा आयोजित प्रतियोगिता फागुन २० गतेसम्म संचालन हुनेछ । प्रतियोगिताको विजेताले ८० हजार र उपविजेताले ४० हजार नगद प्राप्त गर्नेछन् ।
