लागूऔषध गाँजासहित तीन पक्राउ
सिमराः प्रहरीले १२ केजी अवैध लागुऔषध गाँजासहित तीन जनालाई पक्राउ गरी सार्वजनिक गरेको छ । जीतपुरसिमरा १ स्थित पथलैयास्थित प्रहरी चौकीबाट खटिएको प्रहरी टोलीले उनिहरुलाई पक्राउ गरेको हो ।
पक्राउ पर्नेमा जीतपुरसिमरा २२ चकरीका २५ वर्षीय नरेश बम, ४३ वर्षीय हिरामान थिङ, ३५ वर्षीय सुरेश स्याङतान् रहेका छन् । अमलेखगंजबाट पथलैयातर्फ आउदै गरेको ना२ह ४९५० नम्बरको अटोबाट उनिहरुलाई गाँजासहित नियन्त्रणमा लिएको बाराका प्रहरी प्रवक्ता पुरुषोत्तमप्रसाद पाण्डेले जानकारी दिए ।
यसैगरी इलाका प्रहरी कार्यालय अमलेखगंजबाट खटिएको प्रहरी टोलीले दुई केजी लागुऔषध अफिम र मोटरसाइकल बरामद गरेको छ ।
हेटौडाबाट पथलैयातर्फ आउदै गरेको प्रह ३–०३–००१ प ३२७६ नम्बरको मोटरसाइकल जाँच गर्ने क्रममा नरोकी फरार भएको र पछ्याउदै जाने क्रममा अफिम र मोटरसाइकल बरामद गर्न सफल भएको प्रहरीको भनाई छ ।
प्रहरीले पछ्याउन थालेपछि चालकसहित पछाडी सवार व्यक्तिले आधाभार जंगलमा मोटरसाइकल र अफिमको झोला छोडेर जंगलभित्र फरार भएको प्रहरीले जनाएको छ ।
