महोत्तरीले उचाल्यो चेरवन्त गोल्डकपको उपाधी
सिमराः बाराको कोल्हबीमा आयोजित प्रथम चेरवन्त गोल्डकप फूटबल प्रतियोगिताको उपाधी महोत्तरीले उचालेको छ । आयोजक श्री मानसी बाबा युवा क्लबलाई सडन डेथमा पराजित गर्दै महोत्तरीले उपाधी उचालेको हो ।
निर्धारित समयमा दुवै टिमले २–२ को बराबरी खेलेपछि खेल टाइब्रेकरमा धकेलिएको थियो । टाइब्रेकरमा समेत ५–५ को बराबरी भएपछि नतिजा सडन डेथबाट निस्किएको हो ।
सडन डेथमा आयोजकलाई स्तब्ध पार्दै उपाधी उचालेको महोत्तरीले एक लाख नगद प्राप्त गरेको छ भने उपविजेता आयोजकले ५० हजारमा चित्त बुझाएको छ ।
विजेता तथा उपविजेता खेलाडीलाई नगर प्रमुख रामप्रसाद चौधरीसहितका अतिथिले पुरस्कार वितरण गरेका थिए ।
फाल्गुन १३ गतेदेखि सुरु भएको प्रतियोगितामा आठ टिमको सहभागिता रहेको थियो ।
