पचरौतामा एमालेको होली मिलन र पार्टी प्रवेश कार्यक्रम सम्पन्न
सिमराः नेकपा एमाले पचरौता नगर कमिटीको आयोजनामा सोमबार होली मिलन तथा पार्टी प्रवेश कार्यक्रम सम्पन्न भएको छ ।
एमाले केन्द्रीय सदस्य एवम् बारा इन्चार्ज बलवीर चौधरीको प्रमुख आतिथ्यतामा कार्यक्रम सम्पन्न भएको हो ।
कार्यक्रममा वडा नं. ६ मा लोकतान्त्रिक समाजवादी पार्टीबाट वडाध्यक्षको प्रत्यासी रहेका इन्ताज अन्सारी, वडा नं. ८ मा वडाध्यक्षको प्रत्यासी रहेका गफुर अन्सारीको नेतृत्वमा पाँच सय भन्दा बढी नेताकार्यकर्ता एमालेमा प्रवेश गरेको नगर कमिटीले जनाएको छ ।
पार्टी प्रवेश गरेका लोसपाका नेताकार्यकर्तालाई जिल्ला इन्चार्ज चौधरी, पचरौता नगरपालिकाका प्रमुख जलान्धर सिंहले स्वागत गरेका थिए । कार्यक्रममा बोल्दै नगर प्रमुख सिंह विकास निर्माणको कामलाई प्राथमिकता दिएर अघि बढिरहेको बताए ।
नगर प्रमुख सिंहले ९५ प्रतिशत योजनाको कार्यादेश दिइ कार्यान्यवनका क्रममा रहेको बताउदै पचरौताको विकासका लागी आफू पछि नहट्ने बताए । उनले नगरबासीका हितका लागी विभिन्न कार्यक्रम अघि बढाउदै लैजाने प्रतिबद्धता समेत जनाएका थिए ।
एमालेका जयनारायण राउतको अध्यक्षतामा सम्पन्न कार्यक्रममा जिल्ला सचिव अध्यानन्द पाण्डे, नगर उपप्रमुख उपप्रमुख नसिमा खातुन, वडाध्यक्ष लक्ष्मी यादव, धेनुक राउत कुर्मी, बनारसी बिन, गगनदेव यादव, नगर इन्चार्ज सुरेश यादव, भिखारी साह, केदार बैठा, महपतिया देवी दुसादिन, बैधनाथ यादवलगायतको उपस्थिती रहेको थियो । कार्यक्रमको सहजीकरण रोशनकुमार यादवले गरेका थिए ।
