कोल्हबी भलिबल प्रतियोगिताः सेमिफाइनलको समिकरण पूरा
सिमराः कोल्हबी भलिबल प्रतियोगिताको सेमिफाइनलको समिकरण पूरा भएको छ । प्रतियोगिताको दोस्रो दिनको खेल सम्पन्न भएसंगै अन्तिम चारको टुंगो लागेको हो ।
विभागिय टिम नेपाल पुलिस क्लब, एपीएफ क्लबसहित पाथिभरा टाइगर क्लब झापा र मधेस प्रदेश क्लब जनकपुर प्रतियोगिताको सेमिफाइनलमा प्रवेश गरेका छन् । पहिलो सेमिफाइनल खेलमा एपीएफ र झापा भिड्नेछ भने दोस्रो खेल पुलिस क्लब र मधेस प्रदेशबीच हुनेछ ।
यसअघि शनिवार पाँच खेल सम्पन्न भएको थियो । पहिलो खेलमा एपीएफले मधेस प्रदेशलाई सोझो सेटमा पराजित गरेको थियो । यसैगरी दोस्रो खेलमा पुलिसले झापालाई ३–१ सेटमा पराजित गर्दा तेस्रो खेलमा एपीएफले मकवानपुरलाई, चौथो खेलमा झापाले आयोजक जनशक्तिलाई र पाचौ खेलमा मधेस प्रदेशले मकवानपुलाई सोझो सेटमा पराजित गरेको थियो ।
कोल्हबी नगरपालिकाको सहयोगमा जनशक्ति युवा क्लबले प्रतियोगिताको आयोजना गरेको हो । प्रतियोगिताको विजेताले दुई लाख पाँच हजार, उपविजेताले एक लाख पाँच हजार र तेस्रो हुने टिमले ५५ हजार प्राप्त गर्नेछ ।
