हातेमालो सहकारीद्धारा निःशुल्क दन्त परीक्षणको आयोजना
सिमराः हातेमालो बचत तथा ऋण सहकारी संस्था लिमिटेडको आयोजनामा शुक्रवार निःशुल्क दन्त परीक्षणको आयोजना गरिएको छ । जीतपुरसिमरा १६ स्थित जनजागृति माध्यमिक विद्यालयका विद्यार्थीलाई लक्षित गर्दै शिविरको आयोजना गरिएको हो ।
मनोकामना डेन्टल सेवा केन्द्र र नेपाल डेन्टल केयर सेन्टरका चिकित्सको प्राविधिक सहयोगमा आयोजित शिविरमा तीन सय भन्दा बढी विद्यार्थीले दाँतको परीक्षण गराएका छन् ।
शिविरमा डेन्टल सर्जन डा. असद हुसेन, डा. मुकुन्द दाहाल, डा. डिल्लीराम भण्डारीसहित रेखा चौधरी, रमिता साह, श्वेता श्रेष्ठ, दीपलाल साहले विद्यार्थीको दाँतको परीक्षण गरेका थिए । परीक्षणका क्रममा बिद्यार्थीलाई निःशुल्क औषधी, ब्रस, मन्जन समेत वितरण गरिएको थियो ।
१६औं वार्षिकोत्सवको अवसरमा साताब्यापीरुपमा कार्यक्रमको आयोजना गर्ने क्रममा हातेमालोले दन्त परीक्षणको आयोजना गरेको हो । यसअघि बिहिवार जीतपुरमा रक्त परीक्षणको आयोजना गरेको थियो । संस्थाका प्रवन्धक महेश ढुंगलले अमलेखगंजमा निःशुल्क आँखा शिविरको तयारी भईरहेको बताए ।
उत्कृष्ट सहकारीको रुपमा स्थापित हातेमालो सहकारीले जेठ २० गते वार्षिकोत्सव समारोहको आयोजना गर्दैछ ।
