स्कोरपियोले मोटरसाइकललाई ठक्कर दिँदा एकको मृत्यु, एक गम्भीर
सिमराः बाराको सिमरामा भारतीय नम्बरको स्कोरपियोले मोटरसाईकललाई ठक्कर दिँदा एक जनाको मृत्यु भएको छ । दुर्घटनामा अर्का एक गम्भीर घाईते भएका छन् ।
सिमराबाट वीरगन्जतर्फ जादै गरेको बिआर ०५ पिए ९६५२ नम्बरको स्कोरपियोले बिहिवार साँझ ना५६प ५६३२ नम्बरको मोटरसाइकललाई ठक्कर दिँदा जीतपुरसिमरा २ मुसहर्नीमाईका करिब ४५ वर्षीय बुद्धिलाल भुर्तेलको मृत्यु भएको हो ।
मोटरसाइकलमा सवार भुर्तेलको टाउकोमा गम्भीर चोट लागेका कारण मृत्यु भएको प्रहरीले जनाएको छ । दुर्घटनामा मोटरसाइकल चालक कोल्हबीका ४० वर्षीय धर्मराज चौधरी गम्भीर घाईते भएका छन् । चौधरीको वीरगन्जस्थित अस्पतालमा उपचार भईरहेको ईलाका प्रहरी कार्यालय सिमराले जनाएको छ ।
तिव्र गतिमा रहेको स्कोरपियोले सुर्य नेपालको आवास अगाडी सडक पार गर्ने क्रममा मोटरसाइकललाई ठक्कर दिएको प्रत्यक्षदर्शीले बताएका छन् । प्रहरीले स्कोरपियोको चालकलाई नियन्त्रणमा लिएको छ ।
