बारामा १५७ केजी लागूऔषध गाँजासहित सात पक्राउ
सिमराः बारा प्रहरीले एक सय ५७ केजी लागूऔषध गाँजासहित सात जनालाई पक्राउ गरेको छ । ईलाका प्रहरी कार्यालय सिमराको प्रहरी टोलीले आइतबार साँझ जीतपुरसिमरा २२ स्थित अमलेखगंजको जंगलबाट गाँजासहित उनिहरुलाई पक्राउ गरेको हो ।
गाँजा ओसारपसार भईरहेको सूचना पाएपछि प्रहरी नायब उपरीक्षक प्रदीपबहादुर क्षेत्रीको नेतृत्वमा पुगेको प्रहरी टोलीले तीन नेपाली र चार भारतीय नागरिकलाई पक्राउ गरेको हो । जिल्ला प्रहरी कार्यालय बाराले पक्राउ परेका व्यक्तिलाई सोमबार पत्रकार सम्मेलन गरी सार्वजनिक गरेको छ ।
पक्राउ पर्नेमा हेटौडा उपमहानगरपालिका १ का ३९ वर्षीय रोशन नेगी, भिमफेदी गाउँपालिका ९ का ३० वर्षीय मुकेश लामा, जीतपुरसिमरा उपमहानगरपालिका २२ का ३३ वर्षीय बुद्ध पाख्रिन, भारत मोतिहारीका २३ वर्षीय जमालुद्धिन खान, १८ वर्षीय देव कुमार , ३५ वर्षीय जागिरद्धिन मियाँ, भारत बहराईजका २६ वर्षीय अहमद भाट रहेका छन् । उनिहरुको साथबाट बा११च ४९९२ नम्बरको स्कोरपियोसहित एक थान भारतीय नम्बर प्लेटलको पिकअप र एक थान भारतीय नम्बरको मोटरसाईकल बरामद गरेको प्रहरी उपरीक्षक होबिन्द्र बोगटीले जानकारी दिए ।
प्रहरी उपरीक्षक बोगटीका अनुसार हेटौडा उपमहानगरपालिका १ का नेगीले नेपाली नम्बर प्लेटको स्कोरपियो गाडीमा ६ बोरा गाँजा राखेर अमलेखगंजस्थित जंगलमा ल्याएको सूचना पाएपछि प्रहरी घटनास्थलमा खटिएको थियो । जंगलभित्रबाटै अर्को पिकअप गाडीमा राखेर लैजाने योजनासहित नेगीले हेटौडाबाट गाँजा ल्याएको प्रहरी उपरीक्षक बोगटीले बताए ।
नेगीलाई नियन्त्रणमा लिएपछि प्रहरीले भारतीय नम्बर प्लेटको पिकअप गाडी र मोटरसाईकलमा गाँजा लिन आएका व्यक्तिलाई जंगलभित्रैबाट पक्राउ गरेको हो । घटनास्थलबाट पाँच जनालाई पक्राउ गरेको प्रहरीले अन्य दुई जनालाई उनिहरुको बयानका आधारमा पक्राउ गरेको हो ।
प्रहरी उपरीक्षक बोगटीले गाँजा ओसारपसारमा अन्य व्यक्तिको समेत संलग्नता हुनसक्ने देखिएकाले पक्राउ परेका व्यक्तिलाई हिरासतमा राखेर अनुसन्धान सुरु गरिएको बताए । पक्राउ परेका व्यक्तिमाथी लागूऔषध मुद्धामा कारवाही गरिने समेत बोगटीले जानकारी दिए ।
