वीरगंजमाथी काठमाडौंको गोलवर्षा, उपाधीका लागि आयोजकसंग भिड्ने
सिमराः त्रिभुवन आर्मी क्लबका पूर्व खेलाडी विकर्ण श्रेष्ठ नायक बन्दा काठमाडौंको फ्रिडम फाईटर क्लब सिमरामा जारी तेस्रो अन्तर्राष्ट्रिय भेट्रान कप फूटबल प्रतियोगिताको फाइनलमा प्रवेश गरेको छ ।
सिमरा रंगशालामा शुक्रवार भएको दोस्रो सेमिफाइनल खेलमा युनिटी भेट्रान क्लब वीरगन्जमाथी ७-२ को फराकिलो जित हात पार्दै काठमाडौं अन्तिम दुईमा प्रवेश गरेको हो ।
काठमाडौंको जीतमा आर्मीका पूर्व खेलाडी समेत रहेका श्रेष्ठ एक्लैले पाँच गोल गरे । खेलको पहिलो हाफमा एक गोल गरेका श्रेष्ठले चार गोल दोस्रो हाफमा थपेका थिए । काठमाडौंका लागि अन्य दुई गोल सरोज थापा र कलम बिष्टले गरेका हुन् ।
यता वीरगन्जका लागि सन्तोष राई र सुरज श्रेष्ठले समान एक/एक गोल गरेका थिए । खेलको म्यान अफ दि म्याच श्रेष्ठ घोषित भए । उनलाई जीतपुरसिमरा उपमहानगरपालिका वडा नं. १४ की वडाध्यक्ष चयन गुरुङ र वडा नं. ७ का अध्यक्ष सुनिल गुप्ताले म्यान अफ दि म्याचको पुरस्कार वितरण गरेका थिए ।
काठमाडौंले अब उपाधीका लागि आयोजक सिमरा भेट्रानसंग प्रतिस्पर्धा गर्नेछ । पहिलो सेमिफाइनल खेलमा चाबहिल स्पोर्ट्स क्लबलाई ३-२ ले पराजित गर्दै आयोजक अन्तिम दुईमा प्रवेश गरिसकेको छ । दुई टिमबीचको फाइनल भिडन्त शनिवार दिँउसो चार बजेपछि सुरु हुनेछ ।
स्व. मञ्जुदेवी गुप्ताको स्मृतिमा आयोजित प्रतियोगिताको उपाधी विजेताले दुई लाख र उपविजेताले एक लाख नगद प्राप्त गर्नेछ । जीतपुरसिमरा उपमहानगरपालिकाको मुख्य सहयोग र जगदम्बा स्टील्स् प्रालीको मुख्य प्रायोजनमा आयोजित प्रतियोगितामा १२ टिमको सहभागिता रहेको थियो ।
