बाराको जीतपुरबाट जुवा खेलिरहेको अवस्थामा ५ जना पक्राउ
जीतपुर: जीतपुर सिमरा उपमहानगर वडा नं ७ स्थित जीतपुर बजारमा जुवा खेलिरहेको अवस्थामा प्रहरीले ५ जना जुवाडेलाई पक्राउ गरेको छ । प्रहरीले मङ्गलवार उनीहरूलाई जीतपुरका स्थानीय लालबाबु साहको घरमा जुवा खेलिरहेको अवस्थामा ५० हजार नेपाली रुपैयाँ, ३ थान ठुलो र १ थान सानो मोबाइल, २ वटा मोटरसाइकल र केही भारतीय रकमसहित नियन्त्रणमा लिएको हो ।
पक्राउ पर्नेमा जीतपुरका ५५ वर्षीय शिवचन्द्र सहनी, ६० वर्षीय लालबाबु साह, ५० वर्षीय अफताव आलम, वीरगन्ज महानगरपालिका ३२ का ४० वर्षीय विनोद पंजियार र ५२ वर्षीय मोती साह रहेका छन् । इलाका प्रहरी कार्यालय सिमराका प्रमुख प्रदीपबहादुर क्षेत्रीले जुवा खेलिरहेको अवस्थामा प्रहरीले नियन्त्रणमा लिएका ५ जनालाई म्याद थप गरेर कानुनी कारबाही अगाडी बढाइएको बताएका छन् ।
