जनहित उपभोक्ता समितिमा पुनः श्रेष्ठ
सिमरा: पर्सा राष्ट्रिय निकुञ्जको मध्यवर्ती क्षेत्रमा पर्ने जनहित उपभोक्ता समितिको अध्यक्षमा पुनः अमृतलाल श्रेष्ठ निर्वाचित भएका छन् ।
उपभोक्ता समितिको नेतृत्व र पदाधिकारी पुर्नगठनका लागि विहिवार भएको निर्वाचनमा श्रेष्ठ विजयी भएका हुन् । श्रेष्ठले सात मत प्राप्त गर्दा अध्यक्षका अर्का उम्मेदवार मधुसुधन सिटौलाले ६ मत पाए ।
१३ सदस्यीय कार्यसमितिको अध्यक्ष पदका लागि मात्रै निर्वाचन भएको थियो । निर्वाचनमा चार वटा सामुदायिक वन उपभोक्ता समितिबाट आएका १३ जना प्रतिनिधि मतदानमा सहभागी भएका थिए । मतदानमा राधाकृष्ण सामुदायिक वन उपभोक्ता समितिका ५, मुसर्नीमाई सामुदायिक वन उपभोक्ता समितिका ३, जनजागरण सामुदायिक वन उपभोक्ता समितिका ३ र भिमेश्वर सामुदायिक वन उपभोक्ता समितिका २ प्रतिनिधि सहभागी थिए ।
अध्यक्षबाहेक समितिको पदाधिकारी र सदस्य सर्वसम्मत चयन गरिएको छ । समितिको उपाध्यक्षमा ताराबहादुर कार्की, सचिव पेशलकुमार मुल्मी, कोषाध्यक्ष मिठु लामा चयन भएका छन् । यसैगरी समितिको सदस्यमा डिल्लीबहादुर थापा, नलिन्द्रबहादुर थापा, गंगा कार्की, विष्णुप्रसाद अर्याल, पदमबहादुर बस्नेत, शर्मिला तामाङ, फईजुलहक अंसारी, मधुसुधन सिटौला र शोभा लामा चयन गरिएको छ ।
