मौसमका कारण हवाई उडान प्रभावित भएपछि सडकमार्ग हुँदै सिमरा आए पूर्वराजा शाह
सिमराः पूर्वराजा ज्ञानेन्द्र शाह सोमबार सिमरा आएका छन् । मौसमका कारण हवाई उडान अनिश्चित बनेपछि पूर्वराजा शाह सडकमार्ग हुँदै भैरहवाबाट सिमरा आएका हुन् ।
आफैले गाडी चलाएर आएका पूर्वराजा शाहलाई सिमरास्थित प्रभु निवासमा उनका समर्थकले स्वागत गरेका थिए । परिवारसहित आएका पूर्वराजा शाहले प्रभु निवासबाहिर आफ्ना समर्थकसंग भेट गरेका थिए ।
पूर्वराजालाई स्वागत गर्न विभिन्न स्थानबाट उनका समर्थक सिमरा आएका थिए । यसअघि उनको आइतबार सिमरा आउने कार्यक्रम रहेको थियो । तर मौसमका कारण भैरहवा विमानस्थल दिनभर नखुलेपछि सिमरा यात्रा स्थगित भएको थियो ।
पूर्वराजा शाहलाई स्वागत गर्न आइतबार दिउँसो हजारौंको संख्यामा रहेका समर्थक विमानस्थल पुगेका थिए । तर उनको सिमरा आउने कार्यक्रम स्थगित भएपछि समर्थक निराश हुँदै फर्किएका थिए ।
पूर्वराजा शाहले बारा र पर्सामा हुने विभिन्न कार्यक्रममा सहभागी हुने बताइएको छ । उनको कार्यक्रमको विषयमा आधिकारिक जानकारी भने गराइएको छैन ।
