सोनाम ल्होछारको अवसरमा आइतबार सार्वजनिक विदा दिने निजगढ नगरपालिकाको निर्णय
निजगढः तामाङ समुदायले नयाँ वर्षको रुपमा माघ शुक्ल प्रतिपदाका दिन मनाउने सोनाम ल्होछार पर्वको अवसरमा निजगढ नगरपालिकाले माघ २८ गते सार्वजनिक विदा दिने निर्णय गरेको छ । नगरपालिकाको कार्यपालिका बैठकले २८६०औं सोनाम ल्होछारको अवसरमा आइतबार नगर क्षेत्रभित्र सार्वजनिक विदा दिने निर्णय गरेको हो ।
नगरपालिकाका प्रमुख प्रशासकीय अधिकृत अजय बतौंलाले शुक्रवार सूचना जारी गर्दै ल्होछारलाई हर्षोल्लासका साथ मनाउन नगर क्षेत्रभित्रका कार्यालय र शैक्षिक संस्थालाई विदा दिइएको जनाएका छन् ।
तामाङ्ग समुदायले मन्जुश्री संवत् २८६० औं सोनाम ल्होछार ‘डुक ल्हो’ गडुल वर्ष शनिबार मनाउँदैछन् । ल्होछार अर्थात ‘ल्हो’ भन्नाले साल र ‘छार’ भन्नाले नयाँ वर्ष भन्ने बुझाउँछ । पुरानो वर्षलाई बिदा गर्दै नयाँ वर्ष प्रवेश गरेको दिनका रुपमा सोनाम ल्होछार मनाउने गरिन्छ ।
ल्होछारको अवसरमा निजगढ नगरपालिकाका नगर प्रमुख सुरथ पुरी, उपप्रमुख सोममाया थिङ्गलगायतका जनप्रतिनिधिले शुभकामना दिएका छन् ।
