आधाभार नजिक ट्रक र जीप ठोक्किदा दुईको मृत्यु, तीन घाइते
सिमरा: पथलैया-अमलेखगञ्ज सडकखण्ड अन्तर्गत आधाभार नजिक बुधबार बिहान ट्रक र बोलेरो जीप एकआपसमा ठोक्किदा दुई जनाको मृत्यु भएको छ । दुर्घटनामा तीन जना घाइते भएका छन् ।
पथलैयाबाट हेटौंडातर्फ जाँदै गरेको ना६ख नम्बरको ट्रक र हेटौंडाबाट पथलैयातर्फ आउँदै गरेको बागमती प्रदेश ०१-०२६ च १३३४ नम्बरको जीप ठोक्किएको हो । दुर्घटनामा चालकसहित दुई जनाले ज्यान गुमाएका छन् ।
मृत्यु हुनेमा भारत मोतिहारी मधुवन थाना ग्राम कुन्दनपुरका करिब २८ वर्षीय चन्दन चौहान रहेका छन् भने चालकको पहिचान खुल्न सकेको छैन । चालक नेपाली नागरिक रहेको प्रहरीको भनाइ छ ।
दुर्घटनामा परी घाइते तीन जनाको एलएस न्युरो अस्पतालमा उपचार भइरहेको छ । घाइतेको अवस्था गम्भीर रहेको ईलाका प्रहरी कार्यालय सिमराले जनाएको छ ।
